La Ciasa de Palsa Val Badia “Ojöp Frëinademetz” vá zoruch a na fondaziun dl 1898, istituida cun ofertes y scincundes da pert de privac y di comuns dla Val Badia in ocajiun dl iubileo di 50 agn de rëgn dl imperadú Franz Josef I., cun le fin de fá sö na ciasa por porsones dala meseria. La fondaziun “Kaiserjubiläums-Armenversorgungshaus für den Gerichtsbezirk Enneberg” á cumpré la vedla ciasa Freieck a Piculin y tut sö i pröms ghesć de jügn dl medemo ann. Por le guern di ghesć y la direziun él gnü fat n contrat cun l’ordin dles Monies dla Ciarité. L’aministraziun ti speta a n comité de chël che al fej pert le degan dl decanat Mareo, n raprejentant di ombolc dla Val Badia y le cassier dla iurisdiziun de Mareo.

Tl 1952 delibrëia le Comité de Aministraziun la costruziun de na ciasa nöia por i vedli dlungia la dlijia de Sant Antone, tres a Picolin. Ai 13 de jügn 1955 él gnü invié ia i laurs cun la deponüda dla pröma pera y bel 3 agn de do, ai 5 de jená, á podü la ciasa cun 35 posć gní inaugurada.

Tl 1975 vëgn la Fondaziun reconesciüda sciöche Istituziun Publica por Assistënza y Benefiziënza y aproé le statut nü. La Fondaziun vëgn aministrada da n consëi d’aministraziun metü adöm da 5 mëmbri y 2 mëmbri de sostituziun nominá dai consëis de comun di cinch comuns dla Val Badia.

Tl 1978 delibrëia le Consëi d’aministraziun adöm ai ombolc dla valada da fá sö na ciasa plü grana a San Martin deache chëra da Piculin ê massa picera. Porchël él gnü fat n consorz danter i comuns y la Fondaziun. Ai 29 de ma él gnü benedí la pröma pera y a mez otober 1985, rovada la pröma pert dla ciasa, á podü les mëdes y i berbesc se trasferí tla ciasa de palsa nöia.

Tl 1986, ai 16 de otober, é la ciasa denominada “Ciasa de Palsa Val Badia Ojöp Frëinademetz” gnüda inaodada solenamënter cun la prejënza dl presidënt dla Junta Provinziala Dr. Silvius Magnago.

Tl 1989, al 1. de dezëmber, él gü daurí n repart de cura da vint lec por “Langzeitkranke”.

Tl 1990 él gnü lascé sö le consorz por la costruziun dla ciasa de plasa y cun n contrat de donaziun ti él gnü sorandé le frabicat ala Fondaziun.

Deache la Ciasa de Palsa á bojëgn de laurs de ressanamënt, vëgnel aprové na restroturaziun. Tl forá 2009 se trasferësc les mëdes y i berbesc tl Hotel Diamant tl zënter de San Martin y ai resta ailó cina al trasloch derevers tl agost 2011. Ai 22.10.2011 vëgn la nöia Ciasa de Palsa Ojöp Frëinademetz inaugurada solenamënter.