En sabeda, ai 4 de ma, él gnü tigní te Ciasa de Palsa Ojöp Frëinademetz la premiaziun y la daurida dla mostra dl concurs por la seleziun de n inom por le bar publich nü y la respetiva realisaziun de n logo. Al concurs á tut pert 46 porsones che á mené ite bëgn 61 propostes desfarëntes.

La comisciun metüda adöm dal Presidënt y dal Diretur dla Ciasa de Palsa sciöche ince da na rapresentanza dl personal y di residënc/residëntes, n' á nia albü n laur saurí da chirí fora l’inom y le logo por chësc local, che dess deventé n zënter sozial, n post d’incuntada da sté saurí, olache les generaziuns s’incunta, olache residënc dla strotöra rüva adöm cun jënt da defora, olache le personal pó passé süa palsa y olache an pó, te n’atmosfera familiara, se bëre y se mangé val’ de pice o ince ma passé le tëmp deboriada pro na ciacolada o val’ passatëmp, sciöche al stá scrit tla publicaziun dl concurs.

L’inom y le logo chirí fora é „BARJËNT“ de Ferdigg Bruno da Rina. Fora de süa descriziun pón lí: „La parora „Barjënt“ é n jüch de parores, ara contëgn trëi parores ladines: bar, jënt y arjënt. La parora „arjënt“ stá por la maturité de na porsona y ince por l’eté avanzada y nia ma. Al é n corú chît y lisier, al significhëia ince „de gran cualité“. La parora „jënt“ stá por: comunité, sté adöm, deboriada, dötes/düc é bëgnodüs/bëgnodüdes, jënt s’incunta (anfat de ci eté). Le simbol é na copa dl café, mo nia ma, le tanf dl corú grisc rapresentëia ince i ciavëis dl corú arjënt. Tl simbol dla copa pón ince odëi na bocia che s’la rí, che fej tres bun, al ô dí, che te chësc bar se stan saurí y la jënt vëgn saludada cun n bel rí.“

La comisciun á chirí fora chësta sciöche la miú proposta cun chësta motivaziun: „La comisciun vëiga te „BARJËNT“ n inom autentich y original. L’idea dl jüch de parores (bar, arjënt, jënt) á dër plajü y insciö ince la spligaziun di pinsiers che stá doia. L‘inom inviëia insciö a na reflesciun plü ampla y plü sota y respidlëia döt adöm dër bun le carater, l’identité, l‘intenziun y la finalité dl bar dla Ciasa de Palsa.“

Sciöche secunda proposta él gnü premié l’inom „Bar Belsté“ de Crazzolara Alessandra y sciöche terza „L’incuntada“ de Crazzolara Enea. Ai pröms trëi classificá ti él gnü sorandé n pest de € 600,00, € 400,00 y € 200,00.

La manifestaziun é gnüda stlüta jö cun n pice bufet y n complimënt y rengraziamënt a düc y dötes chi y chëres che á tut pert. N bel dilan ince a Pire Ellecosta da La Plí che á abelí musicalmënter le domisdé.

Les propostes che é gnüdes ite é da odëi tl bar dla Ciasa de Palsa cina a mez jügn.